Argazkian, Iker Rodrigoren atxiloketa salatzeko mobilizazioa atzo Erandion.
Iker Rodrigo Bizkaiko Sorturen koordinatzaileordea
kalean dago jada. Eloy Velasco Espainiako Auzitegi Nazionaleko 6.
epaitegiko magistratuak bi orduz galdekatu ostean aske utzi du,
fidantzarik gabe, Ukberri.net agerkari digitalak zabaldu duenez. Erandioztarra atzo atxilotzeko agindu zuen Velascok.
Halere, Lutxanako politikariak bi astero epaitegira joan beharko du
sinatzera eta pasaportea erretiratu diote. Gauzak horrela, Xabier Lopez
Peña euskal preso politikoa zenaren harreragatik abiatutako ikerketan inputatuta
jarraituko du Iker Rodrigo, "terrorismoa goratzea" leporatuta. Hasier
Arraiz Sortuko presidenteak gatazkaren konponbidea oztopatu nahi
dutenekin lotu du Rodrigoren atxiloketa, gaur goizean Radio Euskadin
egin dioten elkarrizketan. Arratsaldean, 20:00etan Itzubaltzeta / Romo
eta Areeta artean dagoen Xake plazan egingo diote harrera Iker Rodrigori.
Itzubaltzetan bizi da mutila.
Arraiz gaur goizean berretsi duenez Sortuk ez zuen antolatu Lopez Peña zenaren hilotzaren harrera. Bere ustez, "Rodrigo atxilotu dute Lopez Peñaren sendiaren gertukoa delako. Kointzidentzia hori bilatu nahi izan dute harreraren atzean Sortu dagoela esan eta ilegalizazioarekin mehatxu egiteko". Lopez Peñaren sendiak atzo goizean aldarrikatu zuten harrera ekitaldiak "pribatuak" zirela eta ezein erakunderik ez zituela antolatu.
Bitartean, Espainiako Auzitegi Gorenak D3M eta Askatasuneko
11 kideren absoluzioa berretsi du gaur goizean, Efe albiste-agentziak
zabaldu duenez. Auziperatutako lagunen artean Eli Zubiaga algortarra eta Iker Rodrigo lutxanarra bera daude.
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.